Darllenwch y dudalen hon yn Saesneg
Wrth gynllunio eich cwricwlwm a gwneud penderfyniadau am ddysgu ac addysgu, byddwch yn defnyddio amrywiaeth o dystiolaeth gadarn. Bydd hyn yn cynnwys arbenigedd sy’n benodol i ddisgyblaethau, dysgu o ymholiadau proffesiynol, gwybodaeth o ymchwil, gan gynnwys Gwybodaeth leol, cenedlaethol a rhyngwladol.
Mae prosiect Camau i’r Dyfodol yn gweithio gydag ymarferwyr i ddatblygu ein dealltwriaeth gyffredin o gynnydd ac asesu. Gallwch ddarllen am y prosiect yn ein blog blaenorol.
Datblygwyd y model Ysgolion fel Sefydliadau Dysgu yng Nghymru dros nifer o flynyddoedd, yn seiliedig ar waith gyda’r OECD (y Sefydliad ar gyfer Cydweithrediad a Datblygiad Economaidd).
Mae’r Rhwydwaith Tystiolaeth Gydweithredol (CEN) yn cynnwys sefydliadau addysg uwch ac eraill sydd wedi edrych ar effeithiau pandemig COVID-19 ar wahanol agweddau ar y system addysg ac ar grwpiau penodol o ddysgwyr. Maen nhw’n archwilio ffyrdd o liniaru’r effeithiau hynny, yn ogystal â ffyrdd o gefnogi ymarferwyr a dysgwyr yn well wrth symud ymlaen.
Yn ein blog ym mis Mehefin, nodwyd bod Llywodraeth Cymru yn gweithio mewn partneriaeth â’r Education Endowment Fund (EEF) i gefnogi ymarfer sy’n seiliedig ar dystiolaeth. Yn ddiweddar, cyfarfu Lizzie Swaffield o’r EEF ag ymarferwyr Grŵp Polisi Cwricwlwm i Gymru yn Abertawe i edrych ar y cyfleoedd a’r heriau o ddefnyddio adnoddau EEF yng nghyd-destun Cymru ac yng nghyd-destun y Cwricwlwm i Gymru.
Gall defnyddio tystiolaeth ac arbenigedd dibynadwy gefnogi hyder ysgolion bod eu dulliau gweithredu’n briodol. Er enghraifft, mae tystiolaeth o gynnydd dysgwyr mewn llythrennedd pan fo addysgu ffoneg yn benodol ac yn systematig yn rhan o ddull ysgol gyfan ehangach sydd hefyd yn cefnogi eu dealltwriaeth o’r hyn maen nhw’n ei ddarllen, ac yn datblygu eu geirfa a sillafu mewn amgylchedd llawn iaith.
Bydd ardal llythrennedd newydd ar Hwb yn ei gwneud yn haws i ymarferwyr ddod o hyd i ddeunyddiau ategol, adnoddau ac astudiaethau achos sy’n gysylltiedig â chynnydd dysgwyr mewn gwrando, siarad, darllen ac ysgrifennu. Fel rhan o hyn, bydd gwybodaeth i ysgolion am offer Microsoft sy’n helpu dysgwyr i ddatblygu llythrennedd. Bydd mwy yn cael ei ychwanegu at y maes llythrennedd yn ystod y misoedd nesaf.
Mae gwybodaeth am ddarllen ar gyfer ymarferwyr a gwybodaeth ar gyfer rhieni a gofalwyr hefyd wedi’i choladu mewn canllawiau newydd defnyddiol.
Os ydych chi’n ymarferydd mewn ysgol neu leoliad sy’n defnyddio’r Cwricwlwm i Gymru ac yn frwd dros weithio gydag eraill i gyd-lunio datrysiadau, cwblhewch y Ffurflen mynegi diddordeb ar gyfer rhestr wrth gefn y Grŵp Polisi.