Diolch yn fawr! Ymlaen â ni.

Read this page in English

A ninnau ar gyrraedd carreg filltir gyffrous yn y broses o greu ein cwricwlwm newydd, hoffwn ddiolch i chi am eich rhan chi yn y broses hon.

Mae ymarferwyr ar draws Cymru wedi ymrwymo i’r gwaith arloesol hwn ers ryw dair blynedd. Maent wedi ystyried y meddylfryd rhyngwladol diweddaraf, wedi cael eu herio gan arbenigwyr allanol ac wedi profi’r syniadau  diweddaraf gyda chydweithwyr.

Ar 30 Ebrill, byddwn yn cyhoeddi canlyniad yr adborth – cwricwlwm drafft i Gymru 2022. Rwy’n annog pawb i edrych arno, ei ystyried a rhoi adborth arno cyn y dyddiad cau, sef 19 Gorffennaf. Mae’r llun isod yn rhoi amserlen i chi o’r camau nesaf.

(Gweler fersiwn ehangiadwy yma)

Ar drothwy’r cam nesaf yn y broses o ddatblygu’r cwricwlwm, gofynnaf i bob ysgol ymroi’n llwyr i’r adnoddau drafft a dechrau meddwl am sut y gellir defnyddio Cwricwlwm Cymru 2022 yn eu cyd-destun nhw.

Bydd nifer o gyfleoedd ym mis Mai a Mehefin i ymarferwyr ar draws Cymru ymwneud â’r cwricwlwm drafft. Mae’r consortia rhanbarthol, gyda chymorth Llywodraeth Cymru, yn trefnu cyfres o ddigwyddiadau hygyrch. Rwy’n annog unrhyw un sydd ddim yn ymwybodol o’r datblygiadau, neu wedi ymwneud â nhw eto, i fanteisio ar un o’r cyfleoedd hyn, gan obeithio y bydd y digwyddiadau yn eich cyffroi ac yn eich hysgogi.

Wrth i ni nodi’r garreg filltir bwysig hon, byddwn yn mynd ati nawr i wrando ar adborth a mireinio’r cwricwlwm.

I’n helpu, yn hyn o beth, rydym wedi sefydlu rhwydwaith o grwpiau gwella ansawdd. Bydd y grwpiau hyn yn llai na’r gweithgorau arloesi presennol ond byddant yr un mor effeithiol o ran cyfraniad a phrofiad yr ymarferwyr. Mae ail grŵp o ysgolion braenaru hefyd wedi’i benodi, a fydd yn ystyried y Cwricwlwm drafft i Gymru fel cyfanwaith, ac yn ein cynorthwyo yn ystod y cyfnod o gasglu adborth a gwerthuso’r fframwaith llawn y cwricwlwm.

Bydd y ddau grŵp yn ein helpu i fireinio’r cwricwlwm, a bydd y fersiwn honno yn cael ei chyhoeddi ym mis Ionawr 2020.

I gloi felly, diolch i chi am eich gwaith caled a gwerthfawr dros y tymor hwn. Rydych yn gwneud gwaith gwirioneddol wych. Mwynhewch eich gwyliau Pasg.

Kirsty

Y Gweinidog Addysg Kirsty Williams

Ysgolion arloesi – y restr:

Mae un ar bymtheg o ysgolion arloesi – 4 o bob ardal consortiwm rhanbarthol – wedi’u penodi i ystyried y cwricwlwm i Gymru 2022 ddrafft a chefnogi Llywodraeth Cymru yn ystod y cyfnod adborth i werthuso’r fframwaith.